बाबुराम शर्मा
भीमेश्वर नगरपालिका–६ झुले भन्ने स्थानमा करोडौँ लगानीमा निर्मित हिमालयन अनुसन्धान विज्ञान तथा प्रविधि प्रतिष्ठानको भवन अलपत्र एवम बेवारिसे अवस्थामा रहेको छ ।
संघको एक करोड ५१ लाख छ हजार २५० रुपियाँमा निर्मित सो भवन उद्देश्य अनुरुप प्रयोगमा आउन नसकेपछि प्रयोगविहीन बनेको बताइएको छ ।
वडाध्यक्ष नवीन लामाले भन्नु भयो, संघबाट बजेट आयो, भवन निर्माण सुरु भएर दुई तलामै थन्किएको छ । तीन तला बनाउनुपर्ने हो । थप बजेट नआएपछि निर्माण पनि रोकिएको छ । कार्यविधि बनाएर सञ्चालन गर्नुपर्ने हो तर प्रक्रिया जटिल बन्दै गएपछि सञ्चालन पनि हुन सकेन । भवन बनेको स्थानमा सरकारी १७ रोपनी जग्गा रहेको छ ।
मध्यकस्तरका जनशक्ति उत्पादन गर्ने थलो बनाउन खोजिएको हो । नगरका पूर्वाधार विकास तथा वातावरण व्यवस्थापन शाखा प्रमुख ई. सुरेश राउतले भन्नु भयो, भवन त बन्यो तर सञ्चालनका लागि बजेट, दक्ष जनशक्ति, स्वीकृतिलगायतका काममा विलम्ब हुन पुग्दा भवन प्रयोगविहीन बन्न पुगेको हो ।
निर्माण भएको भवनलाई प्रयोगमा ल्याउन सम्बन्धित निकाय ( विश्व विद्यालय तथा सिटिइभिटी ) को मापदण्ड अध्ययन गरी प्रस्तावना तयार गरेर सम्बन्धनका लागि आवश्यक प्रक्रिया अगाडि बढाउने निर्णय भएको उहाँले बताउनु भयो ।
